«Зарабілі паўтары тысячы рублёў». Блогеры, якія прадавалі на мінскім рынку «паветра шчасця» ў пакеціках, узарвалі TikTok

23 лiстапада 2022 у 1669194900
«Зеркало»

У TikTok завірусілася відэа пра тое, як двое блогераў у мінулую нядзелю прадавалі на мінскім фермерскім рынку надзьмутыя цэлафанавыя пакеты з рознымі відамі паветра. За тры дні ролік сабраў больш за 800 тысяч праглядаў, а колькасць каментароў падбіраецца да тысячы.

@onegintut кому пакетик с воздухом? #минск #minsk #беларусь #рынок ♬ Miss you - Official Sound Studio

На відэа, якое выклаў магілёўскі ціктокер Жэня Анегін, ён сам і блогерка з Баранавічаў Алёна Мелавацкая вялі гандаль на фермерскім рынку ў Мінску - за прылаўкам з шыльдай «Прадаём паветра» яны ўручалі людзям надзьмутыя пакуначкі, дзе не было нічога, акрамя паветра.

Можна было купіць «паветра шчасця, паветра поспеху, паветра лесу, паветра дабрабыту», а кожны пакецік нібыта каштаваў 20 рублёў.

Мяркуючы па роліку, гандаль ішоў спраўна: чарга па «рэдкі і ўнікальны тавар» не заканчвалася. За 20 хвілін, запэўніваюць блогеры, яны зарабілі паўтары тысячы беларускіх рублёў.

Меркаванні каментатараў, якія спрабавалі зразумець, што гэта было, падзяліліся. Адны выказалі здагадку, што гэта пастановачнае відэа і «жарт для лайкаў», іншыя ўбачылі ў гэтым долю праўды: «Я так і ведала, што жарт пра тое, што хутка будзем плаціць за паветра, - далёка не жарт».

Некаторыя карыстальнікі западозрылі блогераў у махлярстве і запатрабавалі паведаміць у «кампетэнтныя органы» і падатковую.

Знайшліся і тыя, хто сур'ёзна зацікавіўся таварам: «Паветра лесу… калі мы ўсе з каментатараў былі ў лесе? Выходныя аддала б проста за тое, каб пабыць у лесе».

Расказалі і пра яшчэ больш незвычайную гандлёвую схему: «Мой пляменнік у ЗША так прывід у слоіку прадаваў за 100 даляраў. Дзіця прыйшло забіраць, дык мая сястра хутка спыніла ўгоду».