Да пачатку 9-га кінафестывалю «Паўночнае ззянне» засталося некалькі дзён. Фэст пачнецца 13 лістапада і прадоўжыцца да 26 лістапада. Другі год запар на «Паўночным ззянні» можна будзе паглядзець сучаснае ўкраінскае кіно ў межах спецыяльнай праграмы UKRAINE MON AMOUR. У праграму ўвайшлі тры фільмы ўкраінскіх аўтараў.
Гэта рэкламны матэрыял. Рэклама дапамагае нам працаваць і расказваць беларусам сапраўдныя навіны. Тэкст напісаны нашым партнёрам. Калі вы хочаце падтрымліваць незалежную беларускую журналістыку і прарэкламаваць свой прадукт — абавязкова напішыце нам.
Праграма UKRAINE MON AMOUR прысвячаецца смелай барацьбе Украіны за свабоду і супраць расійскай агрэсіі, а таксама з’яўляецца шчырым жэстам падтрымкі ўкраінскіх калег і каляжанак, сяброў і сябровак у кіно.
«Бачанне матылька», 2022, Украіна, Чэхія, Харватыя, Швецыя
Ігравы
22.11.2023 — анлайн з 00.00 да 23.59 (даступны ў любым пункце свету)
«Бачанне матылька» — фільм пра ваеннапалонную, якая носіць дзіця ад свайго катавальніка. Пасля месяцаў за кратамі на Данбасе экспертка ў паветранай выведцы — украінка Лілія — вяртаецца дамоў да сям'і. Аднак траўма палону не пакідае гераіню і прарываецца, як у сне. Нешта, што расце ў Ліліі, не дае ёй забыць, аднак жанчына адмаўляецца ідэнтыфікаваць сябе як ахвяру і гатова змагацца за сваю волю.
Стужка «Бачанне матылька» была знята да поўнамаштабнага ўварвання Расіі ва Украіну. Першапачаткова рэжысёр Максім Наканечны хацеў прыцягнуць увагу сусветнай грамадскасці да вайны ва Украіне, якая пачалася ў 2014 годзе. У выніку «Бачанне матылька» стала поўнаметражным дэбютам рэжысёра, а таксама жорсткай, але своечасовай споведдзю абаронцаў Украіны і ўсіх жанчын, што змагаюцца за цэласнасць сваёй краіны, волю і будучыню.
Сусветная прэм’ера фільма адбылася ў рамках праграмы «Асаблівы погляд» Канскага кінафестывалю.
«Я, Ніна», 2022, Украіна, Германія
Ігравы
23.11.2023 — анлайн з 00.00 да 23.59 (даступны ў любым пункце свету)
«Я, Ніна» — другі поўнаметражны фільм рэжысёркі Марысі Нікіцюк. Гэта драма ў стылі рэалізму, заснаваная на сапраўдных падзеях: рэзкіх жыццёвых зменах паспяховай тэлезоркі Ніны праз рак. Гісторыя вядзе гераіню ад залатых вяршынь яе прыгожага жыцця да яго найцямнейшых частак. Перад Нінай адкрываецца цэлы новы свет, які яна не прымае, але мусіць трываць і ў ім змагацца за сваё жыццё.
Апроч рэальнай гісторыі ўкраінскай тэлевядучай, якая выступіла прадзюсаркай фільма, рэжысёрка пры напісанні сцэнара абапіралася на дадзеныя з 30 інтэрв'ю, якія яна правяла з лекарамі і пацыентамі.
У акторкі Ксеніі Хіжняк, для якой гэта першая праца ў кіно, атрымалася праўдзіва сыграць жанчыну, якая падвяргаецца сталаму стрэсу, і яна ўдала паказала ўнутранае дужанне гераіні самой з сабой. Дзякуючы чаму ў гледача ёсць магчымасць адчуць усю глыбіню трагедыі гэтай гісторыі і трансфармацыю галоўнай гераіні.
«Мы не згаснем», 2023, Украіна, Францыя, Польшча, ЗША
Дакументальны
24.11.2023 — анлайн з 00.00 да 23.59 (даступны ў любым пункце свету)
«Мы не згаснем» — дакументальны фільм пра пяцярых украінскіх падлеткаў з Данбаса, якія, як і ўсе тынэйджары, слухаюць музыку, малююць, гуляюць і мараць пра свабоду і даследаванне вялікага свету, аднак усё гэта адбываецца насуперак страшнай рэчаіснасці навокал. Аднойчы яны атрымліваюць унікальную магчымасць скарыць Гімалаі.
Рэжысёрка Аліса Каваленка здымала гэты фільм з 2019 па 2022 год у Луганскай вобласці. Гісторыя складаецца вельмі мазаічна, паступова расказваючы пра лёс кожнага з пяці герояў, аўтарка адпраўляе гледача ў вельмі эмацыйнае падарожжа. Якое дзякуючы не толькі самой гісторыі, але і мантажу, цудоўнай аператарскай працы і выдатнаму музычнаму афармленню не мае шанцаў пакінуць гледача абыякавым. Сусветная прэм’ера фільма «Мы не згаснем» адбылася на Берлінале, пасля чаго дакументальная стужка стала трыўмфатарам шматлікіх міжнародных кінафестываляў.
Прымеркавана да паказу фільма «Мы не згаснем» 18 лістапада, а 14.00 (па мінскім часе) анлайн у прамым эфіры адбудзецца івэнт «У вайны не дзіцячы твар».
«У вайны не дзіцячы твар» — размова з Алісай Каваленка пра тое, што рэжысёрка адчувае на вайне і як выглядае дзяцінства на лініі фронту. Мадэраваць размову будзе дырэктарка кінафестывалю «Паўночнае ззянне» Воля Чайкоўская. Мовы мерапрыемства: украінская, беларуская.
Фільмы праграмы UKRAINE MON AMOUR будуць даступныя для прагляду анлайн бясплатна з 00.00 да 23.59 (па мінскім часе) згодна з раскладам па папярэдняй рэгістрацыі (калі глядач раней не рэгістраваўся на платформе кінафестывалю ці анлайн-кінатэатра VODBLISK).
Таксама «Паўночнае ззянне» прапануе далучыцца да вялікага збору «Запакуй неба», які арганізоўваюць Новая пошта і фонд «Павярніся жывым». Мэта збору — паляпшэнне працы супрацьпаветранай абароны, што дазволіць ратаваць жыцці мірных людзей ва ўсёй Украіне.
УВАГА! Плацяжы з беларускіх і расійскіх банкаўскіх картак на згаданы рахунак небяспечныя. Калі вы знаходзіцеся ў Беларусі і хочаце зрабіць ахвяраванне, выкарыстайце для гэтага картку замежнага банка або папрасіце зрабіць данат знаёмых, што жывуць за мяжой.
Глядзіце сучаснае ўкраінскае кіно ў спецыяльнай праграме UKRAINE MON AMOUR.
Арганізатар: кінакампанія Volia Films.
Генеральныя партнёры: Амбасада Нарвегіі ў Літве, LTAID — Lithuania development cooperation, CPVA — Central Project Management Agency, Дацкі інстытут культуры ў Літве, Латвіі і Эстоніі, Creative Europe MEDIA DESK, ESTDEV.
Пры падтрымцы: PÖFF — Tallinn Black Nights Film Festival, Дацкі інстытут Кіно, Эстонскі Інстытут Кіно, Ісландскі Цэнтр Кіно, Нацыянальны Кінацэнтр Латвіі, Літоўскі Цэнтр Кіно, Фінскі Фонд Кіно, Нарвежскі Інстытут Кіно, тэлеканал «Настоящее время», Шведскі Інстытут Кіно, Skalvija, Docudays UA, HER Docs, Беларуская незалежная кінаакадэмія, Еўрапейскі гуманітарны ўніверсітэт, CreateCulture Group, EU NEIGHBOURS.
Генеральны інфармацыйны партнёр: «Люстэрка».
Інфармацыйныя партнёры: 34mag.net, KYKY, cineuropa.org, citydog.io, «Будзьма беларусамі», «Наша Ніва».