У эфіры дзяржканала «Беларусь 1» выйшаў сюжэт пра былога намесніка старшыні праўлення «Тэхнабанка» Дзмітрыя Богуша, які са снежня мінулага года знаходзіцца ў СІЗА. У відэа, якое так і называецца — «інтэрв'ю-раскаянне», бізнесовец расказаў, за што яго затрымалі.
Дзмітрый Богуш 18 гадоў працаваў у банкаўскай сферы, быў намеснікам старшыні праўлення ААТ «Тэхнабанк». Пасля заняўся бізнесам — пабудаваў ветрапаркі на дзвюх пляцоўках у Гродзенскай вобласці.
У снежні 2022 года 50-гадовага Богуша затрымалі па артыкуле аб «распальванні варожасці» (ч. 2 арт. 130 КК) — ён нібыта пісаў у сацсетках каментары з пагрозамі на адрас Лукашэнкі і сілавікоў.
Сам бізнесовец у «пакаяльным» інтэрв'ю расказаў, што ў 2020 годзе выкладваў на сваёй старонцы ў Фэйсбуку «непрыгожыя, нядобрыя» публікацыі, аднак пры гэтым заклікаў сваіх падпісчыкаў да дыскусіі:
— Прасіў выказвацца пра тое, што адбываецца. Я сам заўзяты праціўнік гвалту ў якой-кольвек форме.
Паводле словаў Богуша, публічна выказацца ў сацсетках яго падштурхнулі фатаграфіі са збітымі маладымі людзьмі, затрыманымі на акцыях пратэсту пасля выбараў 2020 года.
Бізнесовец расказаў, што пасля выдаліў свае пасты, аднак адмовіўся з’ехаць з Беларусі, хоць яму на гэта «празрыста намякалі» знаёмыя.
Са снежня 2022 года Дзмітрый Богуш знаходзіцца ў СІЗА. Па ч. 2 арт. 130 КК яму пагражае да дзесяці гадоў пазбаўлення волі.
