Польшчы не варта чакаць «ніякіх актыўных агрэсіўных дзеянняў» з тэрыторыі Беларусі. Пра гэта заявіў Аляксандр Лукашэнка 25 красавіка на Усебеларускім народным сходзе.
У сваёй прамове на другім дні УНС палітык абурыўся абароннымі захадамі, якія распачалі краіны — суседкі Беларусі пасля пачатку поўнамаштабнага расійскага ўварвання ва Украіну.
— Польшча збіраецца стварыць самыя магутныя сухапутныя войскі ў Еўропе. Вядома, з дапамогай вайскова-тэхнічнай падтрымкі Злучаных Штатаў. Варшава паступальна нарошчвае колькасць Узброеных сіл. Да 2035 года плануецца павялічыць іх да 300 тысяч чалавек. Цяпер у іх крыху больш за 190 [тысяч], — расказаў Лукашэнка.
Палітык адзначыў, што не разумее, навошта Польшчы такая магутная армія.
— Мы не збіраемся з імі ваяваць. З тэрыторыі Беларусі яны не павінныя чакаць ніякіх актыўных агрэсіўных дзеянняў. Нам гэта не трэба, — заявіў Лукашэнка, адарваўшыся ад аркуша з тэкстам.
Нагадаем, Аляксандр Лукашэнка гадамі запэўніваў, што «ніколі з нашай тэрыторыі не будуць атакаваць Украіну», і ў выніку не стрымаў абяцанне. 24 лютага 2022 года расійскія падраздзяленні ўварваліся ва Украіну ў тым ліку з тэрыторыі Беларусі.
Чытайце таксама
