У Міністэрстве абароны Расіі заявілі, што працягнулі «паспяховы наступ» на Данецкім напрамку і занялі «больш выгадныя рубяжы» на Паўднёва-Данецкім. Ва ўкраінскім Генштабе паведамілі, што расійскія войскі спрабавалі атакаваць у раёнах 14 населеных пунктаў, але былі адкінутыя. У Інстытуце па вывучэнні вайны расказваюць, што стаіць за зробленымі напярэдадні Пуціным і Лаўровым заявамі.
Расказваем пра галоўнае са зводак штабоў і высноваў экспертаў на 330-ы дзень вайны ва Украіне.
Генштаб УСУ: нанеслі ўдары па двух важных аб’ектах расійскіх сіл
За мінулыя суткі расійскія войскі нанеслі 25 авіяцыйных удараў і правялі больш за 85 абстрэлаў з рэактыўных сістэм залпавага агню, паведамляе Генштаб УСУ ў ранішняй зводцы.
— На Валынскім, Палескім, Северскім і Слабажанскім напрамках пад артылерыйскі і мінамётны абстрэлы трапілі 13 населеных пунктаў; на Купянскім — дзевяць; на Ліманскім напрамку праціўнік абстраляў пазіцыі ўкраінскіх сіл ля пяці населеных пунктаў; на Бахмуцкім напрамку артылерыйскаму абстрэлу падвергліся раёны 22 населеных пунктаў; на Аўдзееўскім — сем; на Навапаўлаўскім — тры; на Запарожскім напрамку ад артылерыйскага агню пацярпелі 24 населеныя пункты; на Херсонскім — больш за 20.
— Падраздзяленні Сіл абароны Украіны адбілі атакі расійскіх войскаў у раёнах населеных пунктаў Белагораўка Луганскай вобласці і Цярны, Верхнякаменскае, Салядар, Соль, Чырвоная Гара, Бахмут, Кляшчэеўка, Аляксандра-Шульціна, Курдзюмаўка, Вадзяное, Мар'інка, Перамога і Параскавіеўка Данецкай вобласці.
— Украінская авіяцыя нанесла 13 удараў па раёнах канцэнтрацыі праціўніка і тры — па пазіцыях зенітна-ракетных комплексаў расіян.
— Збітыя расійскі верталёт Ка-52 і БпЛА «Мерлін-ВР».
— Падраздзяленні ракетных войскаў і артылерыі Сіл абароны Украіны за суткі нанеслі ўдары па трох пунктах кіравання, пяці раёнах канцэнтрацыі, складзе боепрыпасаў і двух іншых важных аб’ектах праціўніка.
Мінабароны РФ: працягваем «спецаперацыю»
У Міністэрстве абароны Расіі заявілі, што працягваюць наступаць пад Данецкам, а УСУ нясе там вялікія страты.
— На Купянскім напрамку ваенная авіяцыя і артылерыя Заходняй ваеннай акругі нанеслі агнявое паражэнне падраздзяленням 14-й і 92-й механізаваных брыгад УСУ ў раёнах населеных пунктаў Навасёлаўскае Луганскай вобласці і Іванаўка Харкаўскай вобласці. Знішчаныя звыш 30 вайскоўцаў УСУ, баявая браніраваная машына, два аўтамабілі, а таксама дзве самаходныя гаўбіцы «Акацыя».
— На Чырвона-Ліманскім напрамку авіяцыя і артылерыя Цэнтральнай ваеннай акругі нанеслі паражэнне падраздзяленням 95-й дэсантна-штурмавой брыгады УСУ ў раёне населенага пункта Серабранка Данецкай вобласці і 24-й механізаванай брыгады УСУ ў раёне населенага пункта Новавадзяное Луганскай вобласці. У раёне населенага пункта Неўскае Луганскай вобласці знішчаны склад артылерыйскіх боепрыпасаў. Страты УСУ за суткі на гэтым напрамку склалі больш за 60 вайскоўцаў забітымі і параненымі, бронетранспарцёр, тры пікапы і гаўбіцу Д-20.
— На Данецкім напрамку падраздзяленні Паўднёвай ваеннай акругі працягвалі наступ і нанеслі агнявое паражэнне ўкраінскім сілам у раёнах населеных пунктаў Галіцынаўка, Краснагораўка і Невельскае Данецкай вобласці. За мінулыя суткі на гэтым напрамку знішчаныя да 80 украінскіх вайскоўцаў, дзве баявыя браніраваныя машыны, чатыры аўтамабілі, тры артылерыйскія ўстаноўкі Caesar, артылерыйская сістэма М-777, артылерыйская ўстаноўка «Гваздзік» і дзве САУ «Акацыя». Акрамя таго, у раёне населенага пункта Карлаўка Данецкай вобласці знішчаны склад боепрыпасаў, а ў раёне населенага пункта Курахова — радыёлакацыйная станцыя контрбатарэйнай барацьбы AN/TPQ-50.
— На Паўднёва-Данецкім напрамку падчас наступлення падраздзяленні Усходняй ваеннай акругі занялі больш выгадныя рубяжы і знішчылі больш за 30 украінскіх вайскоўцаў, дзве баявыя браніраваныя машыны і тры пікапы.
Усяго за суткі, паводле МА РФ, нанесенае паражэнне 67 артылерыйскім падраздзяленням, жывой сіле і ваеннай тэхніцы УСУ ў 98-мі раёнах. Збіты самалёт Су-25 і пяць беспілотных лётных апаратаў.
Інстытут па вывучэнні вайны: у РФ асобным фігурам дазволілі крытыкаваць Пуціна
Пуцін, выступаючы 18 студзеня, паўтарыў стандартную і ілжывую рыторыку, што Расія напала на Украіну, каб абараніць жыхароў Данбаса ад неанацыстаў, што захапілі ў 2014 годзе ўладу. Нейкіх заяваў ад яго пра новую хвалю мабілізацыі або афіцыйнае абвяшчэнне вайны не прагучала насуперак чаканням расійскіх блогераў, адзначаюць у Амерыканскім інстытуце па вывучэнні вайны. Эксперты лічаць, што гэта сведчыць пра няўпэўненасць расійскага прэзідэнта ў сваёй здольнасці істотна ўплываць на нацыянальную інфармацыйную прастору.
Яны мяркуюць, што прамова Пуціна — імаверна, частка буйнейшай і адносна новай інфармацыйнай спробы ўплесці «спецыяльную ваенную аперацыю» ў больш маштабныя расійскія нацыянальныя міфы пра Вялікую Айчынную вайну, каб узмацніць расійскую падтрымку як зацяжной вайны, так і мабілізацыі. Заява міністра замежных справаў Расіі Сяргея Лаўрова, што Украіна і Захад ажыццяўляюць генацыд рускага народа, была зробленая з той жа мэтай, лічаць у ISW.
Параўнанне Лаўровым Захаду з нацысцкай Германіяй эксперты называюць смеху вартым і, напэўна, нацэленым на ўнутраную расійскую аўдыторыю.
«Украіна ніколі не пагражала ўварвацца або захапіць тэрыторыю па-за сваімі міжнародна прызнанымі межамі 1991 года. Ні NATO як альянс, ні якая-кольвек асобная дзяржава, што ўваходзіць у яго, не пагражалі ўварвацца ў Расію, не кажучы ўжо пра тое, каб дамагацца знішчэння рускіх як народа», — падкрэсліваюць у Інстытуце. У той час як Пуцін і Лаўроў працягваюць адмаўляць суверэнітэт Украіны і катэгарычна адмаўляюцца ад прамых перамоваў з ёй.
Звяртаюць увагу ў ISW і на апошнія выказванні ўладальніка ПВК Вагнера Прыгожына ў адрас Мінабароны РФ і Крамля, адзначаючы, што яны становяцца ўсё больш нахабнымі.
Прыгожын наўпрост атакаваў адміністрацыю прэзідэнта Пуціна і намякнуў, што некаторыя чыноўнікі, якія працуюць там, — здраднікі, якія хочуць, каб Расія прайграла вайну ва Украіне, — гэта адзін з самых смелых нападаў Прыгожына на Крэмль на сённяшні дзень, кажуць эксперты. Ён не баіцца наступстваў.
У ISW мяркуюць, што такім чынам Прыгожын і іншыя нацыяналісты, такія як Ігар Гіркін, ствараюць новую інфармацыйную прастору, дзе пэўныя фігуры могуць крытыкаваць Пуціна і найвышэйшыя эшалоны ўлады без відавочнай адплаты. Сам жа Пуцін вырашыў пакуль не падвяргаць цэнзуры гэтыя галасы.
На што яшчэ звярнулі ўвагу эксперты:
— расійскія войскі працягвалі абмежаваныя контратакі, каб вярнуць страчаныя пазіцыі ў Крамянной;
— расійскія войскі працягвалі наступальныя аперацыі ў раёне Салядара, Бахмута, Аўдзееўкі і Данецка;
— Мінабароны Расіі працягвае спробы зменшыць ролю «вагнераўцаў» у заяўленых тактычных дасягненнях у раёне Салядара;
— украінскія афіцыйныя асобы адзначылі, што расійскія сілы канцэнтруюцца ў Запарожскай вобласці, магчыма, для маштабных абарончых або наступальных дзеянняў;
— усё шырэйшае выкарыстанне расійскімі войскамі запальных боепрыпасаў для нанясення звычайных удараў на поўдні Украіны пацвярджае нядаўнюю ацэнку ISW пра тое, што расійскія сілы, імаверна, сутыкнуцца з недахопам звычайных артылерыйскіх снарадаў;
— украінскія і расійскія крыніцы працягвалі ўказваць на тое, што расійскія ўлады, імаверна, рыхтуюцца да другой хвалі мабілізацыі.
