Расійскія войскі некалькі тыдняў таму ўпершыню выкарысталі супраць Украіны новае і даволі небяспечнае ўзбраенне — кіраваныя планіравальныя бомбы УПАБ-1500 В (індэкс К029Б) вагой 1,5 тоны, паведамляе «Украінская праўда» са спасылкай на Defense Express.
Першае выкарыстанне гэтага віду боепрыпасаў было зафіксаванае некалькі тыдняў таму супраць аднаго з аб’ектаў у Чарнігаўскай вобласці. Паводле звестак выдання, на адным з абломкаў былі рэшткі маркіроўкі, якая адпавядае менавіта УПАБ-1500 В.
Гэты планіравальны боепрыпас упершыню быў прадэманстраваны ў экспартнай версіі з індэксам К029БЭ ў 2019 годзе распрацоўшчыкам «ДНВП „Рэгіён“», які ўваходзіць у карпарацыю «Тактычнае ракетнае ўзбраенне», на выставе МАКС.
Тады ж паведамілі, што гэтая бомба ўжо прайшла выпрабаванні, пастаўленая на ўзбраенне ВКС Расіі і атрымала першыя экспартныя заказы.
«Высокая пагроза выкарыстання УПАБ-1500 В заключаецца ў тым, што яна адносіцца да планіравальных, абсталяваная інерцыяльнай і спадарожнікавай сістэмай навігацыі і мае баявую частку вагой 1010 кг, прызначаную для паражэння высокаабароненых аб’ектаў. Дэкларуецца, што бомба можа скідацца за 40 км ад цэлі, для чаго носьбіт мусіць падняцца на вышыню 14 км», — піша выданне.
Акрамя таго, «ДНВП „Рэгіён“» дэманстравала і меншы калібрам боепрыпас УПАБ-500 В (індэкс К08Б), які з’яўляецца паменшанай копіяй УПАБ-1500 В і мае вагу 505 кг, з якіх 390 кг прыпадае на баявую частку пры захаванні іншых асаблівасцяў.
Выданне адзначае, што выкарыстанне Расіяй планіравальных бомбаў застаецца адзінкавай з’явай. Забяспечанне высокай далёкасці патрабуе палёту на значнай вышыні, што спрашчае выяўленне цэляў і магчымасцяў паражэння носьбіта.
