Расійскі беспілотнік ударыў па школе ў Сумскай вобласці. Загінулі дырэктар, завуч, сакратар і бібліятэкар

23 жніўня расійскія войскі не абмежаваліся начной атакай дронаў па Украіне. Раніцай беспілотнікі-камікадзэ Shahed прыляцелі ў Сумскую вобласць. Разбураная школа, ёсць ахвяры, паведамляе МУС Украіны.

Паветраная трывога ў вобласці была абвешчаная ў 9.30, было заўважана некалькі беспілотнікаў, паведамлялі Паветраныя сілы УСУ.

Траплянне ў школу ў Ромнах — горад знаходзіцца за 80 км ад мяжы з Расіяй — адбылося ў 10.05. У выніку будынак быў цалкам разбураны, паведаміла абласная ваенная адміністрацыя.

Паводле інфармацыі МУС, загінулі чатыры работнікі школы — іх целы ўжо знойдзеныя. Гэта дырэктар, завуч, сакратар і бібліятэкар. Падчас паветранай трывогі яны не спусціліся ў сховішча.

Акрамя таго, параненыя чатыры чалавекі, якія праходзілі міма школы, паведамляе паліцыя Сумскай вобласці.

Разбор завалаў завершаны.

Абноўлена ў 14.55. Удакладненая інфармацыя пра колькасць загінулых і параненых.

Чытайце таксама