Bild: Расія ўпершыню скінула на Украіну трохтонную планіравальную авіябомбу — апублікаванае відэа ўдару

Расія скінула на вёску Ліпцы Харкаўскай вобласці звышцяжкую бомбу ФАБ-3000 М-54 з кіравальным модулем планіравання і карэкцыі (КМПК). Пра гэта паведаміў эксперт Bild па аналізе адкрытых дадзеных Юльян Ропкэ.

«Сёння Расія скінула на Украіну першую ФАБ-3000 М-54 КМПК, пашкодзіўшы будынак „Новай пошты“ № 1 у прыфрантавым пасёлку Ліпцы Харкаўскай вобласці. Цяжкая бомба масай тры тоны (баявая частка 1,2 тоны) упала за 15 метраў ад будынка, але ўсё роўна нанесла яму сур’ёзную шкоду», — расказаў Рэпке.

Відэа ўдару па Ліпцах апублікаваў блізкі да ВКС РФ тэлеграм-канал Fighterbomber. Ён паведаміў, што гэта «першае баявое выкарыстанне ў гісторыі чалавецтва бомбы такога калібру з КМПК». Паводле яго звестак, «радыус суцэльнага паражэння ў ФАБ-3000 — 230 метраў, а аскепкі захоўваюць сваю забойчую сілу на далёкасці 1240 метраў».

Планіравальныя бомбы Расія актыўна выкарыстоўвае ва Украіне як мінімум з сакавіка 2023 года. Аднак да гэтага дня самай цяжкай фугаснай авіябомбай у арміі РФ была паўтаратонная ФАБ-1500 М-54.