Падрыхтоўка грамадскай думкі да завяршэння вайны ва Украіне стала важнай тэмай семінара для віцэ-губернатараў, які Адміністрацыя прэзідэнта Расіі (АП) правяла ў Майстэрні кіравання «Сенеж», паведаміў «Коммерсант». Вобраз «перамогі», на які, на думку Крамля, павінныя арыентавацца чыноўнікі, падобны да мірнага плана па Украіне каманды Дональда Трампа і ўмоваў, на якіх гатовы весці перамовы з Масквой Кіеў, перадае «Агентство».
АП зыходзіць з таго, што «канец СВА будзе, і да яго трэба быць гатовым», паведаміла крыніца «Коммерсанта». Паводле яе, завяршэнне вайны павіннае ўспрымацца грамадствам як перамога.
У выбудоўванні вобраза «перамогі» рэгіянальныя ўлады павінныя арыентавацца на «спакойную большасць», а не «раззлаваных патрыётаў» і «лібералаў», гаворыцца ў публікацыі. Большасць, на думку АП, «будзе задаволеная дасягненнем акрэсленых Уладзімірам Пуціным мэтаў (дэнацыфікацыя і дэмілітарызацыя Украіны), а таксама захаваннем за Расіяй новых тэрыторый», вынікае з публікацыі «Коммерсанта». Таксама выданне адзначае, што рэгіянальныя чыноўнікі павінныя імкнуцца «захоўваць і пашыраць гэтую большасць».
Вобраз «перамогі», які прадставілі віцэ-губернатарам, падобны да імавернага плана па мірным урэгуляванні адміністрацыі абранага прэзідэнта Дональда Трампа. Усе прапановы яго дарадцаў, якія траплялі ў прэсу, мяркуюць замарозку цяперашняй лініі фронту і прыпыненне перамоваў пра ўступленне Украіны ў NATO.
У пятніцу ў інтэрв'ю Sky News прэзідэнт Украіны Уладзімір Зяленскі таксама дапусціў магчымасць спынення вайны без неадкладнага вяртання Украіне захопленых Расіяй тэрыторый на ўсходзе і поўдні краіны.
«Нам трэба зрабіць гэта хутка. І тады [акупаваныя] тэрыторыі Украіна зможа вярнуць дыпламатычным шляхам», — сказаў Зяленскі, удакладніўшы, што неакупаваная частка Украіны павінная стаць часткай NATO.
Уладзімір Пуцін гатовы да абмеркавання міру ва Украіне пры пасярэдніцтве Дональда Трампа, пісала Reuters 20 лістапада са спасылкай на пяць крыніц, блізкіх да Крамля. З іх словаў, Расія гатовая вызваліць захопленыя часткі Харкаўскай і Мікалаеўскай абласцей, але настойвае на захаванні тэрытарыяльных заваёваў у іншых украінскіх рэгіёнах і адмове Кіева ад планаў уступіць у NATO.
«Коммерсант» у апісанні вобраза «перамогі», сфармуляванага АП, пра нейтральны статус Украіны не згадвае. Пры гэтым Пуцін у пачатку лістапада казаў, што без нейтралітэту «цяжка сабе ўявіць наяўнасць нейкіх добрасуседскіх адносін паміж Расіяй і Украінай».
Хуткае заканчэнне вайны ва Украіне — адно з ключавых перадвыбарных абяцанняў Трампа, які вяртаецца ў Белы дом.
Адна з галоўных інтрыг чаканых перамоваў — будзе Масква настойваць на неабходнасці перадачы Расіі Данецкай, Луганскай, Запарожскай і Херсонскай абласцей цалкам або пагодзіцца на прызнанне захопленага па фактычнай лініі фронту. Выступаючы ў клубе «Валдай» у пачатку лістапада, Пуцін сказаў, што ўключаныя ў Расію рэгіёны павінныя застацца ў складзе Расіі, не ўдакладніўшы іх межы. Пазней падчас размовы з канцлерам Германіі Олафам Шольцам Пуцін нагадаў пра «прапановы», зробленыя ім «у чэрвеньскім выступе ў расійскім МЗС». Тады гаворка ішла пра вывад украінскіх войскаў з усёй тэрыторыі Данецкай, Луганскай, Херсонскай і Запарожскай абласцей.
Чытайце таксама
