На Балі згвалтавалі 30-гадовую грамадзянку Беларусі, паліцыя затрымала падазраванага — расійскага бізнесоўца Антона Сімутава. Ён таксама імітаваў вар’яцтва, каб паспрабаваць вярнуцца ў Расію, і разграміў арандаваную вілу, піша мясцовае выданне Radar Bali.
Паліцэйскія паведамілі, што да іх звярнулася 30-гадовая беларуска, якая заявіла, што 41-гадовы Сімутаў завабіў яе да сябе на вілу ў раёне Чангу. Яна сцвярджае, што расіянін «трымаў яе ў палоне, пагражаў і здзекаваўся, а потым згвалціў». Паводле дзяўчыны, гэта адбылося ўвечары 19 красавіка.
Акрамя таго, як піша выданне, мужчына падпаліў арандаваную вілу і разграміў там маёмасць — да падазрэння ў згвалтаванні дадалася справа пра вандалізм.
Сімутава затрымала балійская паліцыя, аднак на допытах ён «даваў бязладныя адказы і паводзіў сябе як вар’ят», таму яго адправілі на псіхіятрычную экспертызу. На наступны дзень мужчына голымі рукамі пагнуў жалезныя пруты на акне бальніцы і збег, але быў злоўлены зноў. Ён прызнаўся, што сімуляваў вар’яцтва і планаваў збегчы ў Расію.
Як піша «Холод», выпадак са згвалтаваннем беларускі на Балі — не адзіны, у якім засвяціўся Сімутаў.
Мужчына вядомы як заснавальнік самай буйной у Санкт-Пецярбургу франшызы кальян-бараў, пры гэтым большую частку часу ён жыве на Балі і ў сацсетках называе сябе «прадпрымальнікам і інвестарам». Паводле знаёмых, на востраве ён часта прадстаўляўся маёрам ФСБ і крымінальным аўтарытэтам і ездзіў з паліцэйскім картэжам.
Паводле інфармацыі Baza, Сімутаў датычны да іншых выпадкаў сэксуалізаванага гвалту на Балі — а таксама арганізаваў на востраве наркасекту. Ад яго дзеянняў маглі пацярпець 11 чалавек, жанчын і мужчын.