Увечары 1 чэрвеня літоўскі памежнік смяротна параніў з табельнай зброі чалавека, які спрабаваў уцячы ад пераследу на аўтамабілі непадалёк ад мяжы з Беларуссю. Кіраўнік памежнай службы Літвы Рустам Любаеў расказаў, што загінулы мужчына быў жыхаром Вільнюса, перавозіў кантрабанду і спрабаваў наехаць на памежніка, перадае Delfi.
Інцыдэнт адбыўся увечары 1 чэрвеня ў ваколіцах вёскі Паўдрэну Шальчынінкскага раёна Літвы, проста ля мяжы з Беларуссю. Там аўтамабіль Volkswagen Passat не спыніўся на патрабаванне памежнікаў, паехаў далей і ледзь не збіў супрацоўніка літоўскай памежнай службы. Афіцэры выправіліся за ім у пагоню на службовым уседарожніку, адзін з супрацоўнікаў стрэліў з табельнай зброі і смяротна параніў кіроўцу. У аўтамабілі былі знойдзеныя пачкі меркавана кантрабандных цыгарэт.
Кіраўнік памежнай службы Літвы Рустам Любаеў паведаміў, што загінулы мужчына быў грамадзянінам Літвы і жыхаром Вільнюса з крымінальным мінулым, ён не меў пропуску ў памежную зону. Акрамя таго, у памежнікаў былі звесткі, што яго аўтамабіль можа перавозіць кантрабанду.
— Гэта жыхар горада Вільнюса, які мае ўражлівае крымінальнае мінулае. Ён неаднаразова судзімы за розныя злачынствы, уключаючы парушэнне дзяржаўнай мяжы і захоўванне акцызных тавараў. Таксама ён неаднаразова быў пакараны за іншыя адміністрацыйныя правапарушэнні, — паведаміў Любаеў.
Літоўская паліцыя пачала дасудовае расследаванне з нагоды гэтага інцыдэнту. Таксама ў Вільнюскім памежным пункце памежнай службы распачатае яшчэ адно дасудовае расследаванне па факце кантрабанды, праводзіцца праверка.