Сталі вядомыя новыя падрабязнасці аварыі пад Магілёвам, дзе ўвечары 13 ліпеня загінулі тры чалавекі, у тым ліку дзіця, паведамілі ў Следчым камітэце. Паводле інфармацыі ведамства, за рулём аднаго з аўто была нецвярозая жанчына. ДТЗ забрала жыцці яе родных.
Спачатку паведамлялася, што ўвечары 13 ліпеня паблізу вёскі Фойна кіроўца Volkswagen страціў кантроль над кіраваннем падчас абгону спадарожнай фуры. Іншамарка выехала на сустрэчную паласу і сутыкнулася з Audi.
У той дзень сям’я на Volkswagen вярталася з лецішча. Дзеці перавозіліся ў дзіцячых крэслах.
«Высветлена, што за рулём аўтамабіля Volkswagen знаходзілася 43-гадовая жыхарка абласнога цэнтра. Хімічна-таксікалагічная экспертыза паказала наяўнасць у яе ў крыві больш за 2 праміле алкаголю», — паведамілі ў СК.
Следчыя прыйшлі да высновы, што нецвярозая жанчына ў раёне аварыйна небяспечнага ўчастка, «дэманструючы злачынную нядбайнасць, пачала здзяйсняць абгон». Выконваючы манеўр са значным перавышэннем хуткасці, яна страціла кантроль над кіраваннем і ўвайшла ў некантраляваны занос. У выніку гэтага легкавік выехаў на сустрэчку і сутыкнуўся з Audi.
«У ДТЗ загінулі 34-гадовы муж кіроўцы Volkswagen і яе 5-гадовы сын. Сама жанчына і яе 3-гадовая дачка, а таксама двое 18-гадовых хлопцаў з Audi былі шпіталізаваныя. Праз некалькі дзён пасажыр другой іншамаркі памёр у бальніцы», — расказалі ў СК.
Дзеянні 43-гадовай жыхаркі Магілёва кваліфікаваныя па ч. 5 арт. 317 КК (Парушэнне правілаў дарожнага руху асобай, якая кіруе транспартным сродкам у стане алкагольнага ап’янення, што прывяла з неасцярожнасці да смерці дзвюх і больш асоб). Яна знаходзіцца пад вартай. Ёй пагражае да дзесяці гадоў пазбаўлення волі.