Кампанія «Віталюр» збіраецца перадаць у арэнду ўсе свае гандлёвыя аб’екты сетцы «Санта Рытэйл». На сёння патэнцыйная ўгода знаходзіцца ў «высокім статусе гатоўнасці», заявіў гендырэктар «Віталюра» Аляксандр Калеснікаў, піша «СБ. Беларусь сегодня». Як паведамляецца, угода прадугледжвае продаж абсталявання і рэшткаў тавару. Завяршыць яе плануецца да канца студзеня.
— Паміж ТДА «Віталюр» і ТАА «Санта Рытэйл» дасягнутае пагадненне па заключэнні ўгоды, якая прадугледжвае перадачу ў арэнду ўсіх гандлёвых аб’ектаў сеткі «Віталюр». Мэтай і умовай угоды з’яўляецца поўнае пагашэнне дэбіторскай запазычанасці перад пастаўшчыкамі. На сённяшні дзень мы маем высокі статус гатоўнасці ўгоды, — заявіў гендырэктар «Віталюра» Аляксандр Калеснікаў. — Узгодненыя ключавыя параметры, у тым ліку аб’ём плошчаў, якія перадаюцца ў арэнду. Гэта 84 гандлёвыя аб’екты. Хачу падкрэсліць, што мы не плануем ніякіх рэарганізацыйных рухаў. У межах гэтай угоды юрыдычныя асобы аб’ектаў нерухомасці, якія перадаюцца ў арэнду, застануцца ранейшымі. Ніякіх іншых суб’ектаў гаспадарання, каб пазбегнуць патрабаванняў па запазычанасці, стварацца не будзе. Тым больш не разглядаюцца ніякія пытанні, звязаныя з ліквідацыяй альбо банкруцтвам.
Паведамляецца, што фактычна ўгода заключаная, але патрабуе часу на юрыдычнае афармленне дамоўленасцяў.
Гендырэктар «Санта Рытэйл» Аляксандр Чуйко пацвердзіў, што ўгода мусіць адбыцца ў самыя кароткія тэрміны. Яна прадугледжвае продаж абсталявання ўнутры гандлёвых аб’ектаў для пакрыцця доўгу. Паведамляецца, што гэта прыкладна дзве траціны агульнага доўгу кампаніі. Чакаецца таксама продаж рэшткаў тавару. Завяршыць угоду плануецца да канца студзеня.
Таксама паведамляецца, што разглядаецца магчымасць саступкі даўгоў, але з 1 студзеня, згодна з пастановай урада, любыя падобныя аперацыі забароненыя. Таму кіраўнікі кампаній звярнуліся ў МАРГ, Мінгарвыканкам і КДК з просьбай дапамагчы — афіцыйны дазвол спрасціў задачу ліквідацыі запазычанасцяў перад пастаўшчыкамі.
У «Віталюра» ёсць пратэрмінаваная запазычанасць перад пастаўшчыкамі, якія спрабуюць спагнаць грошы праз суд.
— Да канца наступнага тыдня мы зразумеем фінальную канструкцыю ўгоды. У залежнасці ад гэтага па ўсіх пастаўшчыках будзе складзены графік пагашэння цяперашняй і пратэрмінаванай запазычанасці. Рух і закрыццё даўгоў перад пастаўшчыкамі будзе адбывацца пад кантролем кампаніі «Санта Рытэйл». Два тыдні таму мы таксама дасягнулі ключавых дамоўленасцяў са сваімі банкамі-крэдыторамі, — паведаміў Аляксандр Калеснікаў. — Падпісаны пратакол на ўзроўні старшыняў праўлення ўсіх банкаў, якія ўваходзяць у склад крэдытнага партфеля кампаніі «Віталюр».
Інфармацыю пра пераход гандлёвых плошчаў «Віталюра» на карысць «Санты» пацвердзілі «Люстэрку» таксама некалькі работнікаў гэтай сеткі.
У апошнія гады «Віталюр» актыўна пашыраўся
У 2019−2020 гадах «Віталюр» адкрыў 30 новых гандлёвых аб’ектаў і на 60% павялічыў тавараабарот. У 2021-м планавалася адкрыць яшчэ 10 крамаў, а таксама новую вытворчасць па перапрацоўцы рыбы і морапрадуктаў.
Кампанія Аляксандра Яцука, названая ў гонар сыноў Віталя і Юрыя, якія працуюць разам з бацькам, налічвае амаль 100 гандлёвых аб’ектаў у 14 гарадах Беларусі. У іх працуе каля 7 тысяч чалавек. Акрамя рытэйлу кампанія займае адно з галоўных месцаў як імпарцёр рыбы, а таксама садавіны і гародніны. Летась яна пачала адкрываць алкамаркеты «Нявінны», цяпер іх налічваецца каля васьмі.
Пашырэнне бізнесу, відавочна, патрабуе інвестыцый. Нярэдка бізнес выкарыстоўвае для гэтага крэдытныя рэсурсы. Мяркуючы па ўсім, менавіта з развіццём бізнесу звязанае акумуляванне даўгоў, адлюстраванае ў леташняй фінансавай справаздачы кампаніі.
Пры гэтым варта адзначыць, што з 2020 года перыяд для інвестыцый аказаўся не самым спрыяльным. Паводле звестак «Нашай Нівы», сетка выкупляла гандлёвыя плошчы ў раёне «Мінск Міра». Але гандаль у гэтым раёне не прыносіць чаканай выгады.
Сёлета кампанія працягнула пашырацца і развівацца. У сакавіку адкрыўся супермаркет побач з паркам Чалюскінцаў у Мінску. З’явілася дастаўка прадуктаў, у крамах укараняюць касы самаабслугоўвання.
Летась фінансавая сітуацыя палепшылася
Адначасова, калі паглядзець справаздачнасць кампаніі за мінулы год, гандлёвая сетка завяршыла яго з чыстым прыбыткам 4 млн рублёў пасля 25 млн стратаў у 2020-м. Выручка ад рэалізацыі прадукцыі па выніках 2021 года склала 978 млн рублёў.
Пры гэтым у кампаніі было даволі шмат даўгоў: 158 млн кароткатэрміновых крэдытаў і пазык і амаль 30 млн — доўгатэрміновых. А кароткатэрміновая крэдыторская запазычанасць, то-бок абавязанні перад іншымі кампаніямі, на той момант складала 190 млн рублёў.
Кампанія ажыццявіла два выпускі токенаў на крыптаплатформе банка «БелВЭБ», разлічваючы прыцягнуць да 2025 года тры мільёны даляраў і столькі ж мільёнаў еўра.