Аляксандр Лукашэнка запатрабаваў 10 сакавіка на паседжанні ўрада не дапускаць скачка цэн і ўтрымаць інфляцыю на ўзроўні 7% гадавых. Пры гэтым ён даручыў чыноўнікам дамагчыся гэтага «якімі хочаце спосабамі». Нагадаем, у Беларусі шосты месяц дзейнічае жорсткая сістэма дзяржрэгулявання цэн, праз што крымінальныя справы заводзяць на бізнес нават за капеечнае павышэнне цаны тавараў.
«Цэны — пытанне нумар адзін для людзей. Такога ўсплёску, які адбыўся мінулай восенню, больш дапускаць катэгарычна нельга. Якімі хочаце спосабамі — манетарнымі, рэгулятарнымі, адміністрацыйнымі, — але дамагайцеся, каб, як дамовіліся, трымаць калідор у раёне 7%. Гэтая лічба мусіць быць чырвонай лініяй, яе мусяць разумець бізнес, вытворца і гандаль», — заявіў Аляксандр Лукашэнка, перадае яго прэс-служба.
Лукашэнка таксама заявіў, што «ўсе сацыяльныя абавязанні па павышэнні ўзроўню жыцця насельніцтва Беларусі мусяць быць выкананыя безумоўна, гэта сацыяльны кантракт улады з народам».
Як развіваецца гісторыя з дзяржрэгуляваннем цэн
6 кастрычніка 2022 года Аляксандр Лукашэнка заявіў пра забарону на павышэнне любых цэн у краіне, для чаго выпусцілі спецыяльную дырэктыву. Пасля гэтага Дзяржкантроль ладзіў маштабныя рэйды па крамах, да праверак падключыліся таксама прафсаюзы і дэпутаты. На бізнес заводзілі крымінальныя справы. Да прыкладу, дырэктара магілёўскай крамы ў выніку судзілі за сыр, які падаражэў на 26 капеек, і далі два гады з адтэрміноўкай, потым падобныя прысуды былі ў Лідзе, Баранавічах і Смалявіцкім раёне.
19 кастрычніка ўрад прыняў новую пастанову аб рэгуляванні цэн, у ёй сярод іншага прапісалі тавары, цэны якіх кантралюе дзяржава. Гэтым дакументам таксама ўвялі гранічныя надбаўкі для імпарцёраў і гандлю.
Затым чыноўнікі ўносілі папраўкі ў нашумелую пастанову па цэнах, сярод іншага выключылі з яе ювелірныя ўпрыгожанні, кветкі, некаторыя іншыя тавары.
У гэтай сітуацыі скараціўся асартымент некаторых тавараў, а па асобных пазіцыях наогул узнік недахоп. Пры гэтым у кастрычніку і лістападзе мінулага года ў цэлым па краіне зафіксавалі дэфляцыю — зніжэнне цэн, а са снежня яны зноў пачалі расці.
У пачатку лютага гэтага года Саўмін унёс чарговыя папраўкі ў нашумелую пастанову № 713. Урад сярод іншага пашырыў спіс выпадкаў, калі не трэба ўзгадняць павышэнне адпускных цэн з чыноўнікамі. Таксама дазволілі ўключаць выдаткі на дастаўку ў кошт тавару.
Пастанову адмяняць не будуць, але могуць унесці ў яе папраўкі, у лістападзе 2022 года заяўляў прэм’ер-міністр Беларусі Раман Галоўчанка. «Вядома, прыняцце 713-й пастановы выклікала пэўныя складанасці ў гандлю, такога ніколі не было рэгулявання. Нейкія моманты не былі ўлічаныя тэхнічныя, таму была выдадзеная новая рэдакцыя пастановы ўрада, дзе былі ўлічаныя асноўныя моманты», — адзначаў прэм’ер.