Аляксандр Лукашэнка 31 сакавіка звернецца са штогадовым пасланнем да беларускага народа і парламента, паведамляе тэлеграм-канал «Пул Первого».
«Плануецца, што мерапрыемства пройдзе ў традыцыйным для апошніх гадоў фармаце — ва ўрачыстай абстаноўцы ў Палацы Рэспублікі. У ім возьмуць удзел дэпутаты Палаты прадстаўнікоў, чальцы Савета Рэспублікі, кіраўнікі міністэрстваў, дзяржаўных камітэтаў, мясцовых органаў улады, прадстаўнікі працоўных калектываў, прамысловых прадпрыемстваў, сельскай гаспадаркі, навукі, адукацыі, аховы здароўя, сродкаў масавай інфармацыі, дыпламатычнага корпуса, акрэдытаванага ў Мінску, дэлегацыі ўсіх рэгіёнаў і горада Мінска. Плануецца, што ў мерапрыемстве возьме ўдзел больш за 2,5 тыс. чалавек», — расказаў БЕЛТА кіраўнік адміністрацыі Лукашэнкі Ігар Сяргеенка.
Паводле яго словаў, пасланне — гэта перш за ўсё зварот да беларускага народа, але гэта таксама яшчэ адна магчымасць «данесці дзяржаўную пазіцыю нашай краіны да народаў тых краін, камунікацыі з якімі ў сілу пэўных абставінаў і абвастрэння міжнароднай абстаноўкі, пэўнага геапалітычнага супрацьстаяння трохі страчаныя».
Летась мерапрыемства прайшло ў Палацы Рэспублікі 28 студзеня, на яго сабралася больш за 2500 чалавек. Выступ Лукашэнкі доўжыўся 3 гадзіны 40 хвілін.