Заснавальнікі і кіраўніцтва неназванай IT-кампаніі ўхілялася ад выплаты падаткаў, сцвярджае Камітэт дзяржкантролю. На іх завялі крымінальную справу, ператрусы праводзілі пры падтрымцы АМАПа.
Паводле КДК, тры заснавальнікі і фактычныя кіраўнікі кампаніі арганізавалі ва ўсіх абласных цэнтрах, Мінску і Бабруйску дзейнасць па распрацоўцы праграмнага забяспечання, а таксама аказанні паслуг у сферы прафесійнай IT-адукацыі — то-бок адукацыйных курсаў, у тым ліку для дзяцей.
«У перыяд з 2015 па 2021 год пры суўдзеле 11 асобаў яны стварылі 14 падкантрольных суб’ектаў гаспадарання (з аднайменнай назвай асноўнага таварыства), якія ажыццяўляюць аналагічную дзейнасць і выкарыстоўваюць спрошчаную сістэму падаткаабкладання. Пры гэтым паміж створанымі суб’ектамі штучна размяркоўвалася дзейнасць і выручка галаўной кампаніі, у выніку чаго была заніжаная падатковая база апошняй, што дазволіла яе кіраўнікам ухіліцца ад выплаты падатку на суму 1,6 млн рублёў», — заявілі ў КДК.
У дачыненні да трох заснавальнікаў і фактычных кіраўнікоў кампаніі распачатая крымінальная справа па ч. 3 арт. 243 (Ухіленне ад выплаты падаткаў, збораў) КК Беларусі. Максімальнае пакаранне прадугледжвае да 12 гадоў пазбаўлення волі.
Пры падтрымцы АМАП правялі 37 ператрусаў, наклалі арышт на маёмасць падазраваных на суму больш чым 2 млн рублёў. Як заявілі ў КДК, «падазраваныя віну прызналі, нанесеную дзяржаве шкоду кампенсавалі ў бюджэт у поўным аб’ёме».
Па крымінальнай справе праводзіцца папярэдняе следства.