«Новы польскі ўрад цяпер пераглядае многія праграмы і рашэнні папярэдняга кабінета. Мы будзем гаварыць з польскім бокам пра запуск альтэрнатыўных праграм падтрымкі беларусаў», — заявіў праекту «Позірк» дарадца беларускай дэмакратычнай лідаркі Святланы Ціханоўскай Франак Вячорка, каментуючы прыпыненне праграмы Poland. Business Harbour (PBH).
26 студзеня міністр замежных справаў Польшчы Радаслаў Сікорскі вырашыў прыпыніць удзел МЗС у PBH, «пакуль не будуць прынятыя рашэнні для забяспечання належнай праверкі кампаній і замежнікаў, якія з’яўляюцца яе бенефіцыярамі». Паводле ацэнкі міністэрства, праграма «не апраўдала ўскладзеных на яе надзей». «Сярод іншага, у грамадскай прасторы былі выказаныя пярэчанні што да выкарыстання візаў, выдадзеных у межах праграмы, з мэтамі, несумяшчальнымі з яе ўмовамі», — заявілі ў МЗС.
Замежнікі, якія прэтэндуюць на працу ў польскім IT-сектары, па-ранейшаму могуць падаць заяву на атрыманне візы на агульных падставах і пры выкананні ўсіх патрабаванняў атрымаць візу, якая дае права на працу ў краіне. Пры гэтым МЗС Польшчы заяўляе, што «пачне працу па спрашчэнні візавых працэдур для прадстаўнікоў бізнес-сектара, асабліва ў галінах, найбольш запатрабаваных польскай эканомікай».
У сваім тэлеграм-канале Вячорка заклікаў «не пасыпаць галаву попелам»: праграма не спыненая, а прыпыненая, кваліфікаваныя спецыялісты па-ранейшаму могуць атрымліваць візы, распрацоўваецца механізм іх паскоранай выдачы.
«Наколькі нам вядома, адна з галоўных праблем віз Poland. Business Harbor — нізкая канвертацыя. То-бок людзі масава афармлялі візы PBH, і толькі блізу 35−40% атрымальнікаў скарысталіся імі і прыехалі ў Польшчу. Усяго за апошнія 30 месяцаў Польшча выдала беларусам больш за 600 тысяч візаў розных тыпаў. Другая магчымая прычына — леташні візавы скандал у Польшчы, калі было пацверджана, што многія візы былі выдадзеныя без належных працэдур і праверак, у тым ліку за хабар», — напісаў Вячорка.
«Цяпер мы знаходзімся ў кантакце з прадстаўнікамі польскага ўрада па пытанні аднаўлення праграмы Poland. Business Harbour або запуску яе альтэрнатывы, прызначанай для высокакваліфікаваных работнікаў для Беларусі і рэгіёна. Гэта важна як для беларускага прыватнага сектара, так і для польскага боку, — дадаў Вячорка. — Пры гэтым прыпыненне (не спыненне!) праграмы не азначае спынення выдачы віз. Кваліфікаваныя спецыялісты па-ранейшаму могуць падаваць заяўкі і атрымліваць візы, а механізм паскоранай выдачы цяпер распрацоўваецца».
Чытайце таксама
