Міністэрства падаткаў і збораў хоча ўвесці змены для падатковых кансультантаў. Ведамства вынесла на грамадскае абмеркаванне адпаведны законапраект. Новаўвядзенні сярод іншага мяркуюць, што спецыялісты, якія пацвердзілі кваліфікацыю да 1 чэрвеня гэтага года, мусяць будуць прайсці пераатэстацыю. Як плануецца, зрабіць гэта трэба будзе цягам шасці месяцаў пасля прыняцця змяненняў (калі іх увядуць).
Такія кансультанты сярод іншага тлумачаць, як працуе падатковае заканадаўства, дапамагаюць запаўняць дэкларацыі для фізічных асоб і кампаній.
Як гаворыцца ў абгрунтаванні да законапраекта, чыноўнікі хочуць увесці ліцэнзаванне для падатковых кансультантаў, а таксама прымусіць іх прайсці пераатэстацыю. Яшчэ МПЗ прапануе ўдакладніць патрабаванні да прэтэндэнтаў на такую працу, а таксама пашырыць іх правы і абавязкі і ўвесці «механізм кантролю якасці аказваных паслуг».
«Я як падатковы кансультант лічу немэтазгодным правядзенне пераатэстацыі ў форме вуснага экзамену. Мяркую, што, атрымаўшы атэстат паўгода таму, не магла страціць сваю кваліфікацыю або што веды мае неяк змяніліся, — адзначыла адна з каментатарак законапраекта. — Ці камісія, якая мне прысвоіла гэты атэстат, сумняваецца ў тым, што нешта зрабіла не так. Мы ж і так павінныя раз на два гады пацвярджаць сваю кваліфікацыю. Многія кансультанты не будуць пераздаваць экзамены, а адпаведна, атрымліваць атэстат. Як вынік, падатковых кансультантаў стане менш разы ў тры, і ўся нагрузка пяройдзе на падатковыя органы».
Яшчэ адзін каментатар законапраекта лічыць, што праз прапанаваныя новаўвядзенні можа вырасці нагрузка на падаткавікоў.
«Умова пагалоўнай пераатэстацыі ўсіх падатковых кансультантаў у шасцімесячны тэрмін — залішняя мера, якую неабходна выключыць, — напісаў яшчэ адзін каментатар. — Калі ёсць неабходнасць у дадатковай праверцы ўсіх падатковых кансультантаў, то гэта можна зрабіць у рамках абавязковага павышэння кваліфікацыі. У падатковых кансультантаў ёсць абавязак праходзіць павышэнне кваліфікацыі не радзей 1 разу на 2 гады — значыць, у рамках гэтага павышэння і правесці пераатэстацыю ўсіх цягам 2 гадоў».
«Адвакатаў пераатэставалі. Юрыстаў атэставалі. Цяпер падатковыя кансультанты. Хто наступны?» — задаецца пытаннем у сваім тэлеграм-канале юрыст Ілля Латышаў. «Сантэхнікаў трэба пераатэставаць, зусім ад рук адбіліся ўжо!» — адказалі яму ў каментарах.
Чытайце таксама
