У Мінабароны Расіі заяўляюць, што адбілі наступленні праціўніка ў Харкаўскай, Луганскай і Данецкай абласцях. У Генштабе паведамляюць, што адбілі атакі расійскіх войскаў у раёнах трынаццаці населеных пунктаў у Луганскай і Данецкай абласцях. У Інстытуце вывучэння вайны адзначаюць, што ПВК Вагнера Прыгожына становіцца структурай, здольнай скласці канкурэнцыю Мінабароны Расіі.
Расказваем пра галоўнае са зводак штабоў і высноваў экспертаў на 247-ы дзень вайны ва Украіне.
Генштаб УСУ: «Расійскае камандаванне ўсімі сродкамі спрабуе схаваць рэальныя страты»
«Паводле ўдакладненай інфармацыі, пацверджанае паражэнне жывой сілы і тэхнікі праціўніка за папярэднія дні. Так, у Запарожскай вобласці знішчана 8 адзінак узбраення і ваеннай тэхнікі рознага тыпу і параненыя да 120 вайскоўцаў», — паведамляе Генштаб УСУ ў ранішняй зводцы. Там адзначаюць, што расійскае камандаванне, каб пазбегнуць панічных настрояў сярод асабовага складу, усімі сродкамі спрабуе схаваць рэальныя страты.
— Цягам сутак праціўнік нанёс 15 авіяцыйных і адзін ракетны ўдар, здзейсніў больш за 40 абстрэлаў з рэактыўных сістэм залпавага агню. Пацярпелі населеныя пункты, у тым ліку Белагорка, Новая Каменка, Навагрэдневае Херсонскай вобласці, Стэпавае Запарожскай вобласці і Мар'інка і Паўлаўка Данецкай вобласці.
— Падраздзяленні сіл абароны адбілі расійскія атакі ў раёнах населеных пунктаў Андрэеўка, Белагораўка Луганскай вобласці, Бахмут, Бахмуцкае, Урэменка, Зеленаполле, Салядар, Маёрск, Мар'інка, Невельскае, Новабахмутаўка, Першамайскае, Якаўлеўка Данецкай вобласці.
— Авіяцыя за мінулыя суткі нанесла 29 удараў. Удары прыпалі на 21 раён канцэнтрацыі жывой сілы, узбраення і ваеннай тэхнікі праціўніка, 3 апорныя пункты і 5 пазіцый зенітных ракетных комплексаў.
— Падраздзяленні супрацьпаветранай абароны збілі 2 верталёты Ка-52 і адзін штурмавік Су-25.
— Украінскія ракетныя войскі і артылерыя нанеслі ўдары па чатырох раёнах канцэнтрацыі жывой сілы, узбраення і ваеннай тэхнікі і адным складзе з боепрыпасамі.
Паводле дадзеных УСУ, працягваецца эвакуацыя з левага берага Дняпра ў Херсонскай вобласці. У той жа час адзначаецца ўзмацненне расійскай групоўкі на правабярэжнай частцы мабілізаванымі вайскоўцамі колькасцю да 1000 чалавек. Іх рассялілі ў дамах мясцовых жыхароў, якія пакінулі гэтыя тэрыторыі.
Мінабароны Расіі: «Знішчылі больш за 400 салдат УСУ за суткі»
У Міністэрстве абароны Расіі заяўляюць, што на Мікалаеўска-Крыварожскім напрамку каля лініі баявога сутыкнення цягам сутак нанеслі паражэнне рэзервам украінскіх войскаў і дыверсійным групам: «Знішчана больш за 180 украінскіх вайскоўцаў, восем баявых браніраваных машын і шэсць аўтамабіляў».
— На Купянскім напрамку адбітыя атакі ў кірунку населенага пункта Бераставое Харкаўскай вобласці. Знішчаныя больш за 150 украінскіх вайскоўцаў, адзін танк, пяць баявых машын пяхоты, чатыры бронетранспарцёры і дзевяць пікапаў.
— На Чырвона-Ліманскім напрамку спыненыя наступальныя дзеянні УСУ ў кірунку населенага пункта Чырвонапапоўка Луганскай вобласці. Знішчаныя больш за 50 украінскіх вайскоўцаў, два танкі, тры баявыя браніраваныя машыны і два аўтамабілі.
— На Паўднёва-Данецкім напрамку ў раёне населенага пункта Урэмеўка Данецкай вобласці адкінутая ротная тактычная група УСУ, якая атакавала расійскія пазіцыі. Знішчаныя больш за 30 украінскіх вайскоўцаў, адзін танк, дзве баявыя браніраваныя машыны і адзін пікап.
Усяго за суткі, паводле дадзеных МА РФ, нанесеныя ўдары па шасці пунктах кіравання, 74 артылерыйскіх падраздзяленнях, жывой сіле і ваеннай тэхніцы ў 167 раёнах.
Знішчана пяць складоў боепрыпасаў, збіты верталёт Мі-8, перахопленыя тры беспілотныя лётныя апараты, збітыя ў паветры шэсць снарадаў рэактыўных сістэм залпавага агню HIMARS і «Ураган».
Інстытут па вывучэнні вайны: «Заявы Пуціна сведчаць, што гэтая вайна — генацыд»
Уладзімір Пуцін працягвае адпрэчваць ідэю суверэнітэту Украіны, што прынцыпова несумяшчальна з сур’ёзнымі перамовамі аб спыненні вайны. Пра гэта гавораць у Інстытуце па вывучэнні вайны, спасылаючыся на ўчорашні выступ прэзідэнта РФ.
«Заявы Пуціна адпрэчваюць той юрыдычны факт, што Украіна з’яўляецца цалкам суверэннай дзяржавай, што Расійская Федэрацыя прызнала суверэнітэт Украіны і што ўкраінскі народ існуе як асобная нацыя. Увекавечванне Пуціным наратыву пра тое, што Украіна і Расія — гэта адзіны народ, падзелены на розныя дзяржавы гістарычнымі акалічнасцямі, указвае на яго пастаянную мэту — знішчыць украінскую дзяржаву і сцерці само паняцце пра ўкраінскі народ», — заўважаюць эксперты.
Гэтыя заявы, разам з многімі дзеяннямі Расіі, мусяць выклікаць сур’ёзныя разважанні над пытаннем аб тым, ці з’яўляецца вайна Расіі супраць Украіны актам генацыду, паколькі генацыд юрыдычна вызначаецца як «дзеянні, якія ажыццяўляюцца з намерам знішчыць, цалкам або часткова, нацыянальную, этнічную, расавую або рэлігійную групу», адзначаюць у ISW.
Эксперты таксама звяртаюць увагу на тое, што ПВК Вагнера Прыгожына, падобна, «становіцца паралельным ваенным органам разам з Міністэрствам абароны Расіі», указваючы на аб’явы аб тым, што ПВК набіраюць спецыялістаў «для фарміравання і/або папаўнення разлікаў зенітна-ракетных комплексаў Панцыр-С1, ЗРК С-300, верталётаў і штурмавікоў, спецыялістаў радыёэлектроннай барацьбы». Набыццё Вагнерам баявых самалётаў указвае на тое, што ПВК з’яўляецца «прыкладам кантрактнай арміі, да чаго Мінабароны Расіі імкнулася ўсе гэтыя гады».
Яшчэ з ключавых высноваў экспертаў:
- расійскія крыніцы сцвярджалі, што ўкраінскія войскі вялі контрнаступальныя аперацыі на паўночным усходзе Харкаўскай вобласці і на лініі Крамянная — Лісічанск;
- расійскія войскі працягваюць падрыхтоўку да абароны на ўсходнім беразе Дняпра ў Херсонскай вобласці;
- расійскія крыніцы сцвярджалі, што ўкраінскія сілы правялі абмежаваныя наземныя аперацыі ў Херсонскай вобласці;
- расійскія сілы працягвалі наносіць удары па Данецкай вобласці;
- расійскія вайскоўцы накіравалі мабілізацыйныя паведамленні замежным грамадзянам, якія працуюць у Расіі;
- расійскія акупацыйныя ўлады пачалі адбіраць мабільныя тэлефоны жыхароў на акупаваных Расіяй тэрыторыях для падтрымкі праваахоўных органаў і аператыўных мер бяспекі.