У акупаваным Скадоўску Херсонскай вобласці затрымалі, а потым забілі мясцовую жыхарку Таццяну Мудрэнка. Пра гэта Financial Times расказала сястра-блізнюк загінулай — Наталля Чорная.
Пра трагічны інцыдэнт, які адбыўся яшчэ 7 кастрычніка, першымі расказалі ўкраінскія СМІ.
«Новости Приазовья» 24 кастрычніка пісалі, што 56-гадовую Таццяну Мудрэнка і яе грамадзянскага мужа, 60-гадовага Анатоля Арэхава, затрымалі ва ўласным доме былыя супрацоўнікі ўкраінскай паліцыі, якія пайшлі на супрацоўніцтва з расійскімі акупацыйнымі ўладамі. А праз тыдзень сястры Таццяны невядомыя даслалі фота цела ў моргу і заключэнне судмедэксперта, у якім напісала, што прычынай смерці стала ўдушэнне.
Што расказала сястра загінулай
Наталля Чорная кажа, што пра затрыманне сястры ёй паведамілі ўдзельнікі закрытага чата, у які яна ўступіла, калі прыязджала ў госці да Таццяны ў Скадоўск перад самай вайной.
Людзі напісалі, што Таццяну і яе мужа спынілі і спрабавалі затрымаць нібыта за перавышэнне хуткасці за рулём, але ўмяшаліся мінакі, і іх адпусцілі. Аднак увечары па пару прыйшлі зноў — ужо да іх дадому.
— Я патэлефанавала, а людзі сапраўды бачылі, як іх забіралі, і там вялікі скандал быў. Дом перакапалі, машыну забралі, потым калі ўжо Анатоля выпусцілі, машыну аддалі.
У той жа групе Наталля даведалася і пра смерць сястры. Яна не выключае, што Таццяну маглі забіць за непрызнанне Скадоўска расійскай тэрыторыяй: «Яна магла такое сказаць, яна была баец. Мы разам хадзілі на мітынгі (у першыя дні пасля акупацыі. — Заўв. рэд. «Люстэрка»). Сама Наталля пасля акупацыі горада выехала ў Днепр.
Па словах жанчыны, яе сястра працавала медсястрой у Скадоўску, і ў горадзе яе добра ведалі.
— Адна дзяўчына патэлефанавала мне ўвечары і расказала, як яны яе павесілі. Сказала: ты павінная ведаць, што яны яе чымсьці накачалі, нешта ў рот залілі і павесілі перад судом. Я нават не ведаю, хто гэта бачыў, але так яна мне сказала, — расказала журналістам Наталля.
Хаваць Таццяну выпусцілі яе мужа Анатоля, неўзабаве пасля пахавання мужчына знік. Пра яго лёс дагэтуль нічога не вядома.
Афіцыйна пацвердзіць тое, што адбылося, пакуль немагчыма — Скадоўск знаходзіцца на акупаванай Расіяй тэрыторыі. The Financial Times піша, што журналістам удалося азнаёміцца з пасведчаннем аб смерці, а таксама з перапіскамі ў мэсэнджары з удзелам сведак забойства Таццяны Мудрэнка.