У Германіі выставілі абвінавачанні 99-гадоваму экс-шарагоўцу СС Грэгару Фарманэку, якога следства лічыць датычным да больш чым 3300 забойстваў у канцэнтрацыйным лагеры Заксенхаўзен, піша Bild.
Грэгар Фарманэк жыве ў невялікім мястэчку на захадзе ФРГ разам з жонкай. Па адукацыі ён кандытар. Ён нарадзіўся ў Румыніі ў нямецкай сям'і. У ліпені 1943 г. уступіў у СС. Да канца вайны быў ахоўнікам канцлагера Заксенхаўзен недалёка ад Берліна. У 1947 годзе савецкі вайсковы суд асудзіў яго на 25 гадоў турмы. Ён адседзеў 10 гадоў у турме горада Баўтцэн. У дакументах ГДР яго абвінавачваюць у «злачынствах супраць чалавечнасці» і «шпіянажы».
Некалькі тыдняў таму пракуратура ФРГ выставіла супраць яго новыя абвінавачанні ў датычнасці да больш чым 3300 забойстваў у Заксенхаўзене. Цяпер суд мусіць вырашыць, ці адкрываць працэс на іх аснове. Адным з пазоўнікаў можа стаць 96-гадовы Сімон Ротшыльд, на якім у канцлагеры ставілі медыцынскія эксперыменты. На думку экспертаў, дзеяздольнасць Фарманэка абмежаваная. Імаверна, ён стане апошнім ахоўнікам з Заксенхаўзена, які адкажа за свае дзеянні. Цяпер расследаванне вядзецца ў дачыненні да чатырох чалавек.
Нагадаем, у чэрвені мінулага года суд у Германіі асудзіў былога ахоўніка канцлагера Заксенхаўзен Ёзэфа Шуца на пяць гадоў турмы. На момант абвяшчэння прысуду яму быў 101 год. Яго прызналі вінаватым у суўдзеле ў ваенных злачынствах падчас Халакосту. У красавіку 2023 года ён памёр.
У 2011 годзе за ваенныя злачынствы быў асуджаны былы ахоўнік Іван Дзем’янюк. Пазней перад судом паўсталі Оскар Грэнінг, бухгалтар у Асвенціме, і Райнхальд Ханінг, былы ахоўнік СС у Асвенціме.
Абодва былі асуджаныя за суўдзел у масавых забойствах, але памерлі, так і не дачакаўшыся турэмнага зняволення — ім было па 94 гады.
Былы ахоўнік СС Бруна Дэй ва ўзросце 93 гадоў у 2020 годзе быў прызнаны вінаватым і атрымаў двухгадовы ўмоўны тэрмін.
У 2021 годзе 96-гадовая былая сакратарка нацысцкага лагера смерці Ірмгард Фюрхнер паўстала перад судом за суўдзел у забойстве. Перад пачаткам судовага паседжання яна спрабавала ўцячы, але праз некалькі гадзін была злоўленая.