Мінскае «Дынама», якое выступае ў КХЛ, правальвае сезон. Каманда не дацягвае нават да зоны плэй-оф, нягледзячы на шэраг спрыяльных абставінаў. Крэйга Вудкрафта пакуль не звольнілі, але 26 кастрычніка ў трэнерскі штаб «Дынама» ўвайшоў вядомы ў мінулым гулец зборнай Беларусі Аляксандр Андрыеўскі. Самае цікавае, што гэта ўжо трэцяе з’яўленне Быка, як называюць спецыяліста, у клубе. Тлумачым, чаму такое хаджэнне па коле выглядае недарэчна. Гэта калонка спартыўнай рэдакцыі «Люстэрка».
Камбэк з адтэрміноўкай
Шэрагі «Дынама» Бык афіцыйна папоўніў трэці раз. Хоць чарговы камбэк мог быць нашмат раней. Давайце адновім храналогію.
У мінскім «Дынама» Андрыеўскі скончыў гульнявую кар’еру і пачаў трэнерскую ў сезоне-2006/07. Аляксандр быў памочнікам Любаміра Покавіча, а потым — Эдуарда Занкаўца. Тады КХЛ яшчэ не існавала. Па выніках таго сезону «зубры» сталі чэмпіёнамі Беларусі.
Неўзабаве «Дынама» заявілася ў КХЛ. У другім сезоне Андрыеўскі, тэрмінова выкліканы з «Гомеля», змяніў ля руля каманды нечакана звольненага Глена Хэнлана. У плэй-оф «зубры» не трапілі, але маглі пахваліцца выйгрышам Кубка Шпенглера.
Андрыеўскі застаўся ў «Дынама», але ўжо ў ролі асістэнта. Падчас сезона-2012/13 Бык быў зноў пакліканы на ролю галоўнага трэнера замест Кары Хейкіля. Але плэй-оф беларускай камандзе не скарыўся.
Наступны сезон Андрыеўскі пачынаў у якасці рулявога «зуброў». Аднак сам быў звольнены ў лістападзе. Такім чынам, другі прыход Быка ў «Дынама» расцягнуўся на чатыры гады.
Цікава, што пасля таго звальнення ў 2013-м клуб застаўся вінен Андрыеўскаму грошы. Справа зацягнулася на некалькі гадоў, бок трэнера прыняла нават Гандлёва-прамысловая палата Расіі. У выніку КХЛ узяла на сябе абавязанні прымусіць «Дынама» пагасіць доўг.
І вось цяпер будзе новы камбэк. Хоць яшчэ тры з паловай гады таму менавіта Андрыеўскага разглядалі на ролю зменшчыка Андрэя Сідарэнкі. Дынамаўскі офіс нават узгадніў кандыдатуру Быка ў НАК, а клубная прэс-служба зрабіла пра трэнера падборку кампліментарных выказванняў.
Але дамовіцца з Андрыеўскім не здолелі. Ён не пагадзіўся з ідэямі кіраўніцтва што да камплектавання складу (меркавалася наяўнасць не больш чым аднаго брамніка-замежніка і шасці палявых гульцоў, не лічачы расіян). У выніку паклікалі Крэйга Вудкфрата, які завяршыў сезон на апошнім месцы ў Лізе.
За рысай плэй-оф
Вудкрафта тады не звольнілі, а ў наступных двух сезонах каманда выконвала задачу-мінімум — выхад у плэй-оф. Але цяпер на лаўцы з канадцам будзе трэнер, які ўжо адвык ад ролі асістэнта. У расійскіх клубах КХЛ Андрыеўскі кіраваў «Адміралам», «Сібір'ю» і «Сочы». Падобна, Вудкрафту даюць такім чынам зразумець: любая новая асечка стане падставай для перастановак.
Як жа канадзец дапусціў падобнае?
Галоўная прычына, вядома, на паверхні — вынікі. У 22 матчах каманда набрала ўсяго 22 ачкі і да вечара 27 кастрычніка нават не трапляла ў зону плэй-оф. «Дынама» знаходзілася на дзявятым месцы, апярэджваючы толькі зусім слабы ХК «Сочы» і кітайскі «Куньлунь», які працягвае базавацца ў Расіі і камплектавацца са свету па нітцы.
І не сказаць, што на «зуброў» наваліліся траўмы ці ёсць іншыя канкрэтныя прычыны фіяска. Проста сістэма Вудкрафта пачала буксаваць. У камандзе па-ранейшаму 14 легіянераў, нягледзячы на заклікі МЗС Канады пакінуць тэрыторыю Расіі і Беларусі. Зборным гэтых краін шлях на міжнародную арэну закрыты, таму «Дынама» можа зусім не адцягвацца на патрэбы нацыянальнай каманды. Мінскія рэстараны таксама працягваюць працаваць і радаваць галодныя страўнікі замежнікаў.
Вудкрафт справядліва наракаў на перанос хатняга матчу з «Ак Барсам» з Мінска, дзе быў запланаваны праўладны канцэрт, у Казань. Але якраз у той паездцы дынамаўцы выглядалі бадзёра, набраўшы ў двух матчах у Казані тры ачкі з чатырох магчымых. Правальны адрэзак быў з 24 верасня да 15 кастрычніка: усяго адна перамога ў дзесяці матчах.
«Вудкрафт не асабліва давярае людзям»
Глыбінная прычына няўдач бачыцца ў тым, што Вудкрафту дазволілі прыбраць да рук ледзь не ўсю ўладу. Калі канадзец у 2019-м узначаліў «Дынама» другі раз (першы раз, адпрацаваўшы сезон, быў звольнены ў 2017 годзе), то апальны Дзмітрый Баскаў, які займаў на той момант пасаду гендырэктара «зуброў», сказаў: «Побач з такім спецыялістам [Вудкрафтам] неабходна развіваць беларускага трэнера новай фармацыі, якім можа стаць Міхаіл Грабоўскі. У Мішы для гэтага ёсць усе задаткі і падставы. Акрамя бліскучай гульнявой кар’еры, пра якую мы ўсе ведаем, Грабоўскага вылучае ўменне індывідуальна працаваць з хакеістамі, удасканальваць іх навыкі, адточваць майстэрства, што ён дэманстраваў, праводзячы шматлікія трэнінг-кэмпы. Патэнцыял Грабоўскага-трэнера вельмі вялікі, і мы абавязаныя даць яму магчымасць гэты патэнцыял раскрыць».
Але ў мінулым сезоне Міхаіл пакінуў штаб «Дынама». Затым прыйшла чарга і іншага асістэнта Вудкрафта — Андрэя Мезіна.
Вось што казаў у верасні гэтага года трэнер па АФП Аляксей Дашкевіч, які паспеў пабываць памочнікам канадца:
— Вудкрафт не асабліва давярае людзям, з якімі працуе плячо да пляча. Крэйг лічыць, што існуе толькі яго сфера адказнасці, і дзяліцца паўнамоцтвамі ні з кім не схільны. Увогуле, ёсць у канадца пэўная аўтарытарнасць. Калі б не яна, думаю, каманда ў мінулым сезоне атрымала б вялікую карысць ад нашага ўзаемадзеяння. Таму, лічу, яму варта лепш камунікаваць і больш давяраць калегам.
Рэдкі выпадак, калі ў беларускім хакеі выносяць «смецце з хаты». І калі ў маштабах краіны негатыўны эфект ад «пэўнай аўтарытарнасці» бачны не адразу, то ў спорце вынік хутка расстаўляе ўсё па сваіх месцах.
Замкнёнае кола
Андрыеўскі — таксама не магчымая панацэя, калі Вудкрафта ўсё ж адправяць у адстаўку. Гісторыя паказвае, што беларусу двойчы не ўдалося выправіць у «Дынама» нахіл. Апошняга значнага выніку ў трэнерскай кар’еры Бык дамогся ў сезоне-2016/2017, калі вывеў «Адмірал» у плэй-оф другі год запар.
Але рэч не толькі ў Андрыеўскім. Чаму да гэтага часу ў Мінску не працаваў Андрэй Скабелка, запатрабаваны ў Расіі і Казахстане? Дзе тыя самыя беларускія настаўнікі «новай фармацыі»?
Вудкрафт, нагадаем, (пакуль) кіруе камандай другі раз. Двойчы быў у «Дынама» Андрэй Кавалёў: асістэнтам і галоўным трэнерам (у сезонах-2014/15 і 2015/16), а потым зноў асістэнтам (у сезоне-2018/19). Двойчы звальнялі з «Дынама» (у чэмпіянаце Беларусі і КХЛ) славака Любаміра Покавіча.
Адны і тыя ж трэнеры ходзяць у «Дынама» па коле. І галоўнае, вынік не паляпшаецца. Часам клуб трапляе ў плэй-оф і вылятае ў першым раўндзе, часам нікуды не трапляе, часам ладзіць «перабудову». Гэтае прадстаўленне з загадзя прадказальным фіналам здзіўляе, хутчэй, толькі частатой паўтарэння паказаў.
Чытайце таксама
