У мінулым месяцы беларускія музыкі апублікавалі шмат цікавага матэрыялу. Галоўнай падзеяй, безумоўна, стаў рэліз новага альбома легендарнага Лявона Вольскага — але хапала і іншых годных работ. На нашую просьбу каманда тэлеграм-канала пра беларускую музыку «КЛІК» сабрала топ самых цікавых, на думку яго аўтараў, айчынных музычных рэлізаў верасня.
Lavon Volski — Emihranty
1 гадзіна 2 хвіліны — у такі час змясціўся аповед пра жыццё тысяч беларусаў у эміграцыі.
Лявон Вольскі і яго першы за тры гады альбом «Эмігранты» — гэта самая дэталёвая і эмацыйная ода пра жыццё за межамі Радзімы. Кожная песня — як стадыя прыняцця сваёй эмігранцкай долі: ад адмаўлення і веры ў хуткае вяртанне дадому да легалізацыі ў чужой краіне, асваення мовы і куплі жылля. Часам прастата аповеду і шансонныя матывы падаюцца занадта павярхоўнымі і «ў лоб», а часам, наадварот, трапляюць у самы нерв сваёй шчырасцю.
Канцэптуальна новая праца Лявона нагадвае легендарны «Дом Культуры» NRM — толькі цяпер слухач падарожнічае не па родных мясцінах, а дзе заўгодна, толькі не там.
The Blackwoods — Burn The Ladder
Класічны рок-н-рол будзе жывы, пакуль пад яго уплывам нараджаюцца гурты накшталт The Blackwoods. Мінскае трыа піша музыку ў жанры стоўнер-метал. Хоць назва і выглядае экзатычна, вы дакладна чулі нешта падобнае. Напрыклад, у ранняй творчасці Arctic Monkeys.
У «КЛІК» мы параўналі гэтыя два гурты, хоць насамрэч у The Blackwoods усяго адзін трэк з альбома Burn The Ladder гучыць вельмі падобна. Рэліз аб’яднаў адразу некалькі жанраў: гаражны рок, блюз, індзі, псіхадэл і іншыя. Альбом чапляе сваёй хаотыкай і непрадказальнасцю, а якасць запісу і добрае англійскае вымаўленне вакаліста наогул прымушаюць забыць, што гэта праца нашых землякоў.
Alexey Krivdin — «3+2» (EP)
Вельмі радуе факт, што ў Беларусі засталіся музыкі накшталт Аляксея Крыўдзіна. Гэта вельмі таленавіты чалавек, чыя творчасць толькі набірае абароты.
Крыўдзін — унікальная асоба. Ён і мультыінструменталіст, і аўтар песняў, і аранжыроўшчык, і гукарэжысёр, і прадзюсар… У сваёй музыцы хлопец шмат эксперыментуе з жанрамі і вакальнымі тэхнікамі. «3+2» — гэта вельмі асабісты EP пра глыбокія перажыванні Аляксея. Пра пошук сябе, аб’юзіўныя адносіны, сонны параліч, страту сяброў і страх адзіноты. Праца моцна адгукнецца тым, хто ў жыцці праходзіў праз такое, бо вельмі смела так шчыра спяваць пра такі няпросты досвед.
5051 — «Кэўк і Нік»
5051 — гэта тры беларусы з ЗША, якія змаглі. Хлопцы пішуць бесклапотную музыку з жартоўнымі тэкстамі і з такім рэпертуарам тураць па Чыкага, Нью-Ёрку і Філадэльфіі.
«Кэўк і Нік» — гэта, здаецца, не самая выбітная праца з творчасці 5051, але ў ёй крута адбіваецца вобраз групы: простыя хлопцы, якія проста хочуць весяліцца. Пра сваю эміграцыю яны спяваюць пад іншым вуглом: не забываючы пра цяжкасці, але іранізуючы ім у твар. Раім паслухаць і іншыя працы хлопцаў, а калі пашанцуе — яшчэ і трапіць да іх на канцэрт. Бо проста назваць атмасферу іх выступленняў крутой і бесклапотнай — гэта не сказаць нічога.
Ovvner, luvrz — «Шрамы» (EP)
Калі вам цікава, што атрымаецца, калі змяшаць хіп-хоп з металкорам, — паслухайце «Шрамы». У аўтараў атрымалася бадзёрая альтэрнатыва з перагружанымі гітарамі, экстрым-вакалам і запамінальнымі рыфмамі, якія доўга не выходзяць з галавы пасля праслухоўвання.
Хлопцам з luvrz крыху больш за 20, а яны сваімі сольнымі працамі задаліся мэтай разварушыць беларускую кар-сцэну. У 2021 годзе яны пачыналі як кавер-гурт. Гэты год таксама адзначыўся для luvrz перамогай у конкурсе кавераў ад гурта «Нервы» і першым прызнаннем. З тых часоў яны моцна выраслі ў якасці, а сумесная творчасць з Ovvner’ам стала адпраўным пунктам на першыя пазіцыі музычных чартаў. Гэта, вядома, усяго толькі мары, але хлопцы гэтага дакладна заслугоўваюць.
Найлепшыя рэлізы 2023 года паводле версіі «КЛІК»
Ніжэй — плэйліст, у якім аўтары «КЛІК» збіраюць найлепшыя, на іх думку, рэлізы беларускай музыкі за год. У яго штомесяц дадаюцца навінкі.
Плэйліст «КЛІК» на YouTube — па спасылцы.
Чытайце таксама
