У 2023 годзе за крадзеж затрымалі жанчыну. Аказалася, што яе абвясцілі памерлай сем гадоў таму. Пракуратура запатрабавала прызнаць несапраўдным рашэнне суда пра яе смерць, паведамляе прэс-служба ведамства. Характэрна, што пра гэтую сітуацыю — затрыманне «памерлай» за крадзеж — у пракуратуры даведаліся з прэсы.
У ведамстве расказалі, што беларуска ў 2010 годзе была пазбаўленая бацькоўскіх правоў на сына. З яе спагналі выдаткі дзяржавы на ўтрыманне хлопчыка. З чэрвеня 2010 года жанчына знаходзілася ў вышуку, бо яе месцазнаходжанне не было вядомае. У 2011 годзе суд Добрушскага раёна прызнаў жанчыну без вестак адсутнай. А ў красавіку 2016 года суд прызнаў грамадзянку памерлай.
Па законе суд можа прызнаць грамадзяніна памерлым, калі па месцы яго жыхарства няма звестак пра яго знаходжанне цягам трох гадоў.
Пры гэтым у 2014 годзе жанчына звярталася да начальніка Добрушскага РАУС наконт спынення супраць яе крымінальнай справы пра крадзеж па амністыі. Суд таксама не ўлічыў, што яна знаходзілася ў вышуку і не паказвалася дома, каб не плаціць за ўтрыманне сына.
Пракуратура апратэставала рашэнне суда пра прызнанне жыхаркі Добрушскага раёна памерлай. Цяпер ведамства таксама вырашае пытанне пра спагнанне ў судовым парадку з «ажылай» жанчыны выплачаных дзяржавай сродкаў на карысць яе сына ў выглядзе пенсіі з нагоды страты карміцеля.