Муж і жонка з Віцебска развяліся, але засталіся жыць у адной кватэры. Былы муж пачаў біць і зневажаць жанчыну на вачах дзяцей. Гараджанка ўрэшце падала пазоў супраць былога мужа, запатрабаваўшы маральную кампенсацыю за пакуты. Суд прызначыў ёй удвая меншую суму, чым яна прасіла.
Пара з Віцебска развялася 21 красавіка 2023 года — іх шлюб быў скасаваны рашэннем суда. Пасля гэтага яны засталіся жыць у адной кватэры, і ў нейкі момант мужчына пачаў падымаць на былую жонку руку, абражаў яе і прыніжаў у прысутнасці траіх дзяцей.
Праз некалькі месяцаў такога жыцця жанчына, відаць, звярнулася ў міліцыю ў спробе паўздзейнічаць на былога мужа. Яго судзілі па адміністрацыйным артыкуле за прычыненне псіхічных пакут і цялесных пашкоджанняў і аштрафавалі. Мужчына спрабаваў абскардзіць гэтае рашэнне, але яго пакінулі без зменаў.
Віцяблянка таксама вырашыла спагнаць з хатняга агрэсара маральную кампенсацыю — яна патлумачыла, што «ў выніку атрыманых траўмаў ёй былі прычыненыя маральныя і фізічныя пакуты, якія выявіліся ў фізічным болі, адчуваннях сораму і прыніжэння». Яна хацела, каб мужчына заплаціў ёй 2000 рублёў і кампенсаваў судовыя выдаткі.
Суд Першамайскага раёна Віцебска заняў бок пазоўніцы, але прызначыў іншы памер кампенсацыі «з улікам матэрыяльнага становішча адказчыка, патрабаванняў разумнасці і справядлівасці».
Мужчыну абавязалі выплаціць экс-жонцы 1000 рублёў маральнай кампенсацыі і пакрыць судовыя выдаткі сумай 600 рублёў. Рашэнне суда не абскарджанае, не апратэставанае і ўступіла ў законную сілу.
Нагадаем, у падобную сітуацыю нядаўна трапіла і жыхарка Мінска. Стаміўшыся ад пастаяннага псіхалагічнага гвалту і пагроз былога мужа, з якім жыла ў адной кватэры, жанчына падала пазоў у суд і запатрабавала спагнаць з яго кампенсацыю маральнай шкоды. Шкоду для сябе яна ацаніла ў 2500 рублёў, а яшчэ 250 прасіла для кампенсацыі выдаткаў на юрыдычную дапамогу.
Аднак у той справе мінскі суд задаволіў пазоў у поўным аб’ёме, а не ў «палавіністым».
